Guppy en Anderste Stories

 Al ooit gehoor van Guppy? Haar mens-ma mag geen skoonheid wees nie, maar sy is steeds diep lief vir hierdie ondier! Dit is 'n boek propvol lawwe stories, die goete wat Guppy dikwels laat gebeur en waar Susanna hopeloos te dikwels 'n onwilige deelnemer word. 

 Marly and Me? Toe nie heeltemal so mak nie, want Guppy is eintlik 'n dierasie van 'n heel anderste kleur. Met haar pikswart pels, pikswart hart en skerp wit tande is sy enige skelm se moses en nie altyd 'n gewillige gasvrou nie! Die veearts is onwillig, kinders huil en selfs grootmense is versigtig om nader as 'n armlengte van haar miesies te kom. Maar tog sal sy enigiets doen vir 'n koekie of twee en Susanna is altyd veilig waar Guppy binne hoorafstand rus. 

 

"Guppy het soos 'n onverwagte swangerskap in my lewe gearriveer. Die hond wat nie beplan was nie, wat ons nie eintlik wou hê nie, maar wat tog diep in ons harte gekruip het en uiteindelik ons engel sonder vlerke sou word.

 Sy het my van die lewe geleer. Sy het my geleer dat vandag die enigste dag tot my beskikking is, dat ek dit nou moet geniet en ten volle gebruik want môre is vir niemand gewaarborg nie.

 Sy het my geleer dat die emosies wat ek voel, ook deur ander gevoel kan word en selfs ‘n negatiewe resultaat tot gevolg kan hê.

 Sy het my van geduld geleer en miskien meer nog van onvoorwaardelike liefde – sonder terughou.

 Sy is ‘n beskermer, ‘n trooster, geselskap, ‘n leier en ‘n volger.

 Sy is ... ‘n engel met vier bene.”

 

Die perfekte geskenk aan elkeen wat die lawwe dinge in die lewe kan geniet.

 

 

Lesersindruk

Titel:Guppy en anderste stories

Outeur én uitgewer: Susanna Moolman

Lesers wat van anderste stories hou wat ’n goeie skoot gesonde humor en ’n knippie lewenswysheid bevat, sal lekker lees aan hierdie bundel met 33 skrywes uit die pen van Susanna Moolman. Ek het elke aand voor slaaptyd ’n hoofstuk of twee gelees en het die skrywer se onopgesmukte manier van skryf in ’n gemaklike geselstrant geniet. Dit is ontspannende leesstof met ’n heerlike verskeidenheid temas.

Moolman is ’n fyn waarnemer. Haar soms poëtiese en soms op-die-man-af- beskrywings van mens, hond en natuur noop die leser om af en toe ’n sin wéér te lees net vir die mooi daarvan. Sy vertel, mymer, filosofeer, vermaan en gee raad oor alles en nog wat. Sy glo dat mens bewustelik moet lewe en aanpasbaar moet wees. Vir haar is ’n gesonde humorsin ’n onontbeerlike oorlewingsmeganisme – lag is beslis die beste medisyne. Sy hou gevolglik haar oë en ore oop en verkneukel haar graag aan al die komiese en dikwels inspirerende gebeure wat sommer reg onder ons neuse plaasvind as ons net oplet.

Verskeie van Moolman se vertellinge draai om Guppy, die skrywer se geliefde maltrap woef. Dit is vanuit die staanspoor duidelik dat hond en eienaar ’n baie hegte verhouding het en vele avonture saam beleef. Moolman skryf in die inleiding: “Guppy het soos ’n onverwagte swangerskap in my lewe gearriveer. Die hond wat nie beplan was nie, wat ons nie eintlik wou hê nie, maar wat tog diep in ons harte gekruip het en uiteindelik ons engel sonder vlerke geword het.” Die boek is dan ook opgedra aan “elkeen wat een of ander tyd ontdek dat engele nie altyd onsigbare wesens met groot vlerke is nie, maar meermale vier bene en ’n groot eetlus het!”

Een van die kosbare tong-in-die-kies riglyne wat Moolman in die boek aan bv. haar kinders gee, is: “Jy mag nie jou suster doodslaan wanneer sy jou genadeloos terg nie, al weet ek die begeerte is soms hopeloos te sterk.” Oor haar kennismaking met Pilates skryf sy: “Ek gryp na ’n onsigbare tou iewers, kners op my tande, bewe, stoot boude uit, slaat die buurvrou amper ’n vol blou-oog, en wys my slag met ’n heel nuwe onvroulike posisie. Vars uit die oond.”

Oor Suid-Afrika skryf sy: “Hierdie land het al die eienskappe van ’n vrou. Daardie ewige wispelturigheid van oorvloedige emosies – soms sommer al die seisoene in ’n enkele dag.” “Ek het al die buitekant van jou grense geproe en ondersoek, maar kon nog nie ’n ander plek vind wat soveel verskille binne een enkele plek ingeprop het nie. Dit lyk asof jy bietjies van die hele aardbol se verskeidenheid gegaps het. Net sodat elke nasie hier ’n tuiste in jou binnekant kon vind. Met ’n glimlag kan ek jou verklaar as ’n algehele vraat.” Sy eindig die skrywe met: “Die misdaad mag my dalk inperk, maar ek is steeds vry, want my gees is vry. Hierdie plek bly my tuiste – my geboorteland – my Suid-Afrika.”

Guppy en anderste stories is ’n heerlike leeservaring en ek sien daarna uit om in die toekoms meer van Moolman se werk te lees. Sy is ’n talentvolle en veelsydige skrywer en kan gerus van haar werk as sketse aan ’n plaaslike koerant aanbied.

Meer oor die skrywer:

Susanna Moolman is ook die skrywer van Hoop – ’n reis vanaf rou na innerlike vrede, ’n allesomvattende handleiding wat treurendes aktief help en prakties begelei om deur die rouproses te werk.

Guppy en anderste stories is hier beskikbaar of direk vanaf die skrywer. E-pos gerus floksie@telkomsa.net vir verdere inligting.

 

Louise Viljoen is ’n vryskutresensent van Jeffreysbaai.